新闻话，广州规划中嘅国际金融城，其中一个方案系建空中多层步廊，而且仲会参考岭南建筑嘅传统，融入骑楼元素咁话，到时响度返工嘅白领，唔使日晒雨淋。
听到金融城呢个词，个大脑里边就跳出高耸入云嘅摩天大楼、冷冰冰嘅玻璃幕墙，就好似今日嘅珠江新城咁。你想揾个地方避下雨，遮下太阳，好难。所以，如果金融城可以有骑楼，有走廊，真系一个唔错嘅嘅设计。
骑楼响岭南建筑里边，系一笔宝贵嘅财富。佢不但适应咗南方炎热、雨水多嘅气候特点，创造舒适嘅人居环境，而且环保节能，有骑楼嘅建筑，空调费都悭返唔少。
不过，如今广州寸金尺土，地价高昂，人哋开发商恨不得连马路都起埋楼，边个肯响路边留条走廊？所以骑楼拆少见少，讲唔埋，有一日会完全消失添。
骑楼唔单只遮风挡雨咁简单，佢嘅背后，系一种以人为本嘅理念。正话讲到嘅珠江新城，好多嘢就因为缺乏咗呢种理念，街坊同白领都不甚满意。比如返工要食个平靓正嘅午餐，就难上加难。CBD有一个逐步成熟嘅过程，但系如果从规划设计开始，就从居民或者从业者嘅种种便利出发，相信对佢日后尽快成型，有莫大嘅帮助。
金融城系政府主导嘅一个重要项目，所以规划设计上应该多考虑人嘅因素，咁样先符合长远嘅利益，无论对短期嘅招商引凤，定系长期嘅发展，都有好处。 |
